बुटवल । नेपाल घरेलु तथा साना उद्योग महासंघ लुम्बिनी प्रदेशको तेश्रो अधिवेशन मंगलबार बुटवलमा सम्पन्न भएको छ । महासंघका प्रदेश अध्यक्ष नेत्रप्रसाद पाठकको अध्यक्षता र लुम्बिनी प्रदेशका उद्योग, पर्यटन तथा यातायात मन्त्री प्रचण्ड विक्रम न्यौपानेको प्रमुख आतिथ्यमा तेश्रो अधिवेशन सम्पन्न भएको हो ।
अधिवेशनको उद्घाटन गर्दै मन्त्री न्यौपाने साना तथा मझौला उद्योगबाट प्रयाप्त रोजगारी सृजना गर्न सकिने भएकोले त्यस्ता उद्योग प्रदेशको प्राथमिकतामा रहेको बताउनुभयो । मन्त्री न्यौपानेले स्वदेशमा थोरै लगानी गरेर पनि धेरै मुनाफा आर्जन गर्न सकिने सम्भावनाका उदाहरण दिंदै रोजगारमुखी र निर्यातमुखी उद्योगहरूलाई प्रदेश सरकारले सहयोग गर्ने नीति रहेको बताउनुभयो ।
कार्यक्रममा महासंघका निवर्तमान केन्द्रीय अध्यक्ष श्यामप्रसाद गिरी, महासंघका बरिष्ठ उपाध्यक्ष सूर्यबहादुर कण्डेल, महासंघ केन्द्रीय महिला समितिकी बरिष्ठ उपाध्यक्ष रीता अवाल, उद्योग बाणिज्य महासंघ लुम्बिनी प्रदेशका उपाध्यक्ष कुलप्रसाद न्यौपाने, नेपाल च्याम्बर्स अफ कमर्स लुम्बिनी प्रदेशका अध्यक्ष टंकप्रसाद पोखरेल, रूपन्देही उद्योग संघका पूर्व अध्यक्ष बाबुराम बोहोरा, महासंघ लुम्बिनी प्रदेशका बरिष्ठ उपाध्यक्ष गणेशप्रसाद अधिकारी, महिला समिति अध्यक्ष शान्ति शर्मा, रूपन्देही जिल्ला अध्यक्ष टंकप्रसाद अधिकारी लगायतले शुभकामना व्यक्त गर्नु भएको महासंघका महासचिव जयश्वर पौडेलले जानकारी दिनुभयो ।
मुलुकमा युवाहरूको बिदेश पलायन, दक्ष मजदुरको अभाव, उद्योग दर्ता र सञ्चालनमा आइपर्ने समस्याका बारेमा आ आफ्नो भनाइ राखेका थिए । सो अवसरमा रूपन्देहीका प्रतिष्ठित उद्यमी बसन्तरोका क्षेत्री र दाङकी महिला उद्यमी रचना सुवेदीलाई उत्कृष्ट उद्योगी सम्मानबाट सम्मानित गरिएको छ ।
अधिवेशनमा १२ जिल्लाका झण्डै १५० जना उद्यमीहरुको प्रतिनिधित्व रहेको घरेलु महासंघ लुम्बिनी प्रदेशका अध्यक्ष पाठकले जानकारी दिनु भयो । आज नयाँ नेतृत्वका लागि निर्वाचन प्रकृया शुरु गरिएको संस्थाले जनाएको छ ।
