परासी । रामग्राम नगरपालिकाले बुधवार आप्रवासी दिवस मनाएको छ । “सुरक्षित आप्रवासनको आधार, सूचना र सीप सहितको रोजगार भन्ने नाराका साथ आप्रवासन दिवस २०२४ मनाइएको हो । रामग्राम नगरपालिकामा नगर प्रमुख धनपत यादवको अध्यक्षतामा वैदेशिक रोजगारका क्रममा मृत्यु भएका, अङ्गभङ्ग भएका, लामो समयसम्म सम्पर्क विहीन भएका तथा नेपाल सरकारबाट क्षतिपूर्ति नपाएका परिवारका बालबालिकालाई प्रोत्साहन स्वरूप शैक्षिक सामग्री र न्यानो कपडा वितरण गरिएको छ ।
सन् १९९० मा विश्व आप्रवासी कामदार र उनीहरूका परिवारको हक अधिकार संरक्षणका लागि संयुक्त राष्ट्रसङ्घले अन्तर्राष्ट्रिय महासन्धि पारित गरेको अवसर पारेर हरेक वर्ष डिसेम्बर १८ लाई अन्तर्राष्ट्रिय आप्रवासी दिवसका रूपमा मनाउन थालिएको हो ।
रोजगारदाताबाट पारिश्रमिक नपाउने, सामान्य स्वास्थ्य उपचार सेवा पनि नपाउने, तोकिएको काम र कार्यक्षेत्रभन्दा अन्यत्रै काम गर्नुपर्ने र बेचबिखनमा पर्ने जस्ता मानवीय समस्याहरू अझै पनि आप्रवासी कामदारहरुले भोग्नु पर्ने अवस्था छ ।
रामग्राम नगरपालिका भित्र बैदेशिक रोजगारमा जाँदा मृत्यु भएका, लामो समयदेखि सम्पर्कविहीन, घरेलु हिंसा र परिवारको आर्थिक अवस्था कमजोर भएका परिवारका १६ जना बालबालिकालाई शैक्षिक सामग्री र न्यानो कपडा वितरण गरिएको छ ।
कार्यक्रममा रामग्राम नगरपालिकाकी नगर उपप्रमुख सम्झना चौधरी, रोजगार शाखा प्रमुख सुमन ज्ञवाली, सामुदायिक रेडियो परासीका प्रबन्ध निर्देशक मेघराज गौतम, रामग्राम नगरपालिकाकी मनोसामाजिककर्ता सुमित्रा चौधरी र आप्रवासी हकहित संरक्षण मञ्चका जिल्ला अध्यक्ष रामु भुसाल लगायतले बोल्नुभएको थियो ।
कार्यक्रममा सहभागी भएकी रामग्राम १७ निवासी अंगिरा गुप्ताले आफ्नो श्रीमान् विदेशमा रहँदा नै क्यान्सर भएको र नेपाल फर्किएपछि उहाँको मृत्यु भएको भन्दै दुःख व्यक्त गर्नुभयो ।
यस्तै रामग्राम नगरपालिका वडा नम्बर १८ बस्ने सन्तोषी कुमारी कवँरले “श्रीमान् हिराप्रसाद कवँर विदेश गएको तीन वर्ष भयो, कहिलेकाहीँ मात्रै सम्पर्कमा आउनु हुन्छ भन्दै श्रीमानलाई सम्पर्कमा आउन आग्रह गर्नु भयो ।”—बावुनानी सानै छन् श्रीमान् सम्पर्कमा नआउँदा परिवार धान्न निक्कै गाह्रो भएको छ, कवँरले भन्नु भयो ।
