परासी । रोटरी क्लव अफ नवलपरासीले आफ्नो पाँचौ स्थापना दिवस (चार्टर डे) मनाएको छ । सन् २०२० मा स्थापना भएको क्लवले सोमबार साँझ परासीमा विशेष कार्यक्रमको आयोजना गरी पाँचौ स्थापना दिवस मनाएको हो ।
रोटरी क्वल अफ नवलपरासीका अध्यक्ष सुनिल कसौधनको अध्यक्षता र रामग्राम नगरपालिकाका नगरप्रमुख धनपत यादवको प्रमुख आतिथ्यमा कार्यक्रम सम्पन्न भएको छ ।
कार्यक्रममा क्लवले गरेका सामाजिक कामहरुको चर्चा गरिएको छ । स्थापना कालदेखि नै रोटरीले जिल्लाका विभिन्न पालिकाहरुमा गरेको सामाजिक कृयाकलापहरुको चर्चा गरिएको थियो । क्लवले सरावल गाउँपालिकामा गरेको आँखा शिविर, पाल्हीनन्दनमा गरेको बृहत स्वास्थ्य शिविर, ह्वील चियर वितरण, बृक्षारोपण, ट्राफिक बुथहरुको निर्माण, प्रतिक्षालय निर्माण जस्ता सामाजिक कामहरुको चर्चा भएको छ ।
क्लवले आफ्नो स्थापना दिवसको अवसरमा परासी निलो गेटनिर बुद्धको मूर्ति स्थापना गरेको हो । बुद्धको मूर्ति स्थापना गरी रामग्राम नगरीमा प्रवेश गर्ने सवैलाई स्वागत गरिएको छ । सो अवसरमा रामग्राम नगरपालिकाका नगरप्रमुख धनपत यादवले रोटरी क्लवले गरेको उत्कृष्ट कामको प्रसंशा गर्नु भयो । उहाँले रामग्रामको समग्र विकासका सन्दर्भमा संघसंस्थाहरुसँग समन्वय गरेर अघि बढ्ने बताउनु भयो ।
कार्यक्रममा रोटरी क्लवका डिस्टिक अवार्ड चेयर एजाज आलम, क्लवका संस्थापक अध्यक्ष सुमन गोपाल आचार्य, रामग्राम नगरउप्रमुख संझना चौधरी, वडा नं. १ का अध्यक्ष रुद्रप्रकाश उपाध्याय, नागरिक समाजका अध्यक्ष राधेश्याम सिंह सैथवार, क्लवकी इलेक्ट अध्यक्ष उर्मिला वानिया लगायतले बोल्दै क्लवको स्थापना दिवसको शुभकामना व्यक्त गर्नु भएको छ ।
