परासी । गएको जेष्ठ २३ गतेदेखि शुरु भएको २५ औं राष्ट्रिय सरसफाई सप्ताहको आज छैठौं दिन । सामुदायिक रेडियो परासीले परासीमा सोमबार रामग्राम नगरपालिका भित्रका १८ वटै वडामा दैनिक सरसफाईको क्षेत्रमा काम गर्ने १८ जना सफाईकर्मीहरुलाई सम्मान गरेको छ । रेडियोले परासी खानेपानी तथा सरसफाई उपभोक्ता संस्था परासीको सहकार्यमा सरसफाईकर्मीहरुलाई सम्मान गरेको हो । परासीमा दैनिक सरसफाईमा खटिएका १८ जना सरसफाई कर्मीहरुलाई सम्मान गरिएको सामुदायिक रेडियो परासीले जनाएको छ ।
सम्मान कार्यक्रम सामुदायिक रेडियो परासी ९०.२ मेगाहर्जका अध्यक्ष राजकुमार रेश्मीको अध्यक्षता र रामग्राम नगरपालिकाका नगरप्रमुख धनपत यादवको प्रमुख आतिथ्यमा गरिएको हो । सो अवसरमा बोल्दै नगरप्रमुख यादवले रामग्राम नगरभित्रका विभिन्न संघसंस्थाहरुलाई नगरको विकासमा सहकार्य गर्न आव्हान गर्नु भयो । नगरप्रमुख यादवले खानेपानी र सरसफाईमा व्यक्ति, संस्था वा निकायले मनैदेखि आनिवानीमा परिवर्तन ल्याउने अठोट गर्नु पर्ने बताउनु भयो ।
कार्यक्रममा नगरउपप्रमुख संझना चौधरीले सरसफाई कसैले कसैकालागि गर्ने भन्दा पनि हामीले आफ्नै लागि गर्ने हो भन्ने भावना र व्यवहार प्रदर्शन गर्नु पर्ने बताउनु भयो ।
कार्यक्रममा लुम्बिनी प्रदेश खानेपानी महासंघका अध्यक्ष थानप्रसाद गैर, नागरिक समाजका अध्यक्ष राधेश्यामसिंह सैथवार, सामुदायिक रेडियो परासीका कोषाध्यक्ष चन्द्रमणी चौधरी, सञ्चालक सदस्य मुक्तिप्रसाद पौडेल, प्रेस चौतारी नेपाल नवलपरासीका उपाध्यक्ष गौरीशंकर जयसवाल लगायतले बोल्दै परासी खानेपानीले आफ्नो खानेपानीको गुणस्तर चेक गर्ने, उपभोक्तालाई प्रयाप्त पानीको व्यवस्था गर्ने र सरसफाई क्षेत्रमा पनि योजना बनाएर काम गर्न आग्रह गर्नु भएको छ ।
त्यसअघि कार्यक्रममा परासी खानेपानी तथा सरसफाई उपभोक्ता समितिका अध्यक्ष खगेश्वर पन्थीले खानेपानीको अवस्था, चुनौती र आगामी दिनमा गर्नु पर्ने कामकाबारेमा प्रकाश पार्नु भएको थियो ।
सप्ताहव्यापी कार्यक्रमको भोली अर्थात मंगलबार जिल्ला स्तरीय चित्रकला प्रतियोगिता, स्टोन आर्ट पदस्थापन, पुरस्कार वितरण सप्ताह व्यापी कार्यक्रमको समापन गरिने सामुदायिक रेडियो परासीका सञ्चालन सचिव तोरेन्द्र जिसीले जानकारी दिनु भयो ।
गत जेष्ठ २३ गतेदेखि शुरु भएको सरसफाई सप्ताहमा नगरसरसफाई, बृक्षारोपण, स्टोन र भित्ते आर्ट्स, विभिन्न खानेपानी उपभोक्ताका बीच अन्तक्र्रिया, रेडियो बहस जस्ता कार्यक्रम सञ्चालन गरिएको सामुदायिक रेडियो परासीका प्रवन्ध निर्देशक मेघराज गौतमले नेपाली चेलीलाई जानकारी दिनु भयो ।
