परासी । नवलपरासी उद्योग वाणिज्य संघको आयोजनामा बुधवार छैठौँ नवलपरासी औद्योगिक व्यापार मेला २०८० को समुदघाटन गरिएको छ । नवलपरासी उद्योग वाणिज्य संघका अध्यक्ष ओमप्रकाश अग्रहरीको अध्यक्षता र संघीय सरकारका अर्थमन्त्री डा. प्रकासशरण महतको प्रमुख आतिथ्यमा छैठौ मेलाको उद्घाटन गरिएको हो । मेलाकाे उद्घाटन गर्दै डा. महतले नेपालको अर्थतन्त्र सुधारतर्फ उन्मुख रहेको दाबी गर्नुभयो । उहाँले बैंकको व्याजदर हाल ११ प्रतिशतको आसपासमा रहेको बताउँदै केही समयमा व्याजदर एकल विन्दुमा झार्ने बताउनुभयो ।
उहाँले आम नागरिक र उद्योगी व्यवसायीलाई आत्मविश्वास बढाउन आग्रह गर्नु भयो । अर्थमन्त्री महतले अहिले राजस्व दश प्रतिशतले बढेको बताउँदै बैकमा तरलता रहेपनि लगानी भने अपेक्षा गरे अनुसार नभएको स्वीकार गर्नुभयो ।
अर्थमन्त्री महतले महेशपुर भन्सारमा एक्जिम कोड र क्वारेन्टाईन लगायतका पूर्वाधार निर्माण गर्न पहल गर्ने आश्वासन दिनुभएको छ । उहाँले सडक विस्तार, निर्माणाधिन सडक विस्तारमा भएको ढिलासुस्तीलाई समाधान गर्ने तथा ओझेलमा रहेको रामग्राम स्तूपाको उचित विकास गरि विश्वसामु चिनाउन विशेष पहल गर्ने बताउनुभयो ।
कार्यक्रममा संघका अध्यक्ष अग्रहरीले जिल्लाको आर्थिक विकासमा देखिएका समस्याहरु समाधान गर्न अर्थमन्त्री महतलाइ ध्यानाकर्षण पत्र बुझाउनु भएको थियो । अध्यक्ष अग्रहरीले महेशपुर भन्सारमा एक्जिम कोड, क्वारेन्टाईन नहुँदा आयातमा समस्या, मेहशपुरदेखि परासीसम्मको औद्योगिक करिडोर सडक निर्माण यथाशिघ्र निर्माण गर्नुपर्ने लगायतका विभिन्न क्षेत्रमा जोड दिन आग्रह गर्नु भएको हो ।
कार्यक्रममा पूर्व गृहराज्यमन्त्री देवेन्द्रराज कँडेल, लुम्बिनी प्रदेशसभा सदस्य बैजनाथ जयसवाल, नेपाल उद्योग वाणिज्य महासंघका केन्द्रीय सदस्य केशवप्रसाद भण्डारी, जनता समाजवादी पार्टीका जिल्ला अध्यक्ष धरेन्द्र यादव, नेपाल पत्रकार महासंघका जिल्ला सचिव एवं सामुदायिक रेडियो परासीका अध्यक्ष राजकुमार रेश्मी, संघका उपाध्यक्ष गिरीराज पाण्डे लगायतले मेलाको सफलताको शुभकामना व्यक्त गर्नुभएको संघकी महासचिव तारा आचार्यले नेपाली चेलीलाई जानकारी दिनुभयो । मेलाकाे उद्घाटन अघि परासी बुद्धचाेकदेखि मेला स्थलसम्म विभिन्न साँस्कृतिक सघसगठन र परासीका सघसस्था र विधालयका बिध्यार्थीहरुकाे र्याली निकालिएकाे थियाे । साे अवसरमा यादव समूदायकाे फरुवाइ नाच पनि प्रस्तुत गरिएकाे थियाे ।
बिहिवार भाेलीदेखि मेलामा स्थानीय तथा राष्ट्रिय र छिमेकि देश भारतबाट पनि भोजपुरी क्षेत्रका चर्चित कलाकारको प्रस्तुती रहने मेलाका सांस्कृतिक संयोजक राजेश गुप्तले बताउनु भयो ।
मेलामा देखिएका केही आकर्षक तस्विरहरु(फोटा फिचर)
