बर्दघाट । खानेपानी तथा सरसफाई उपभोक्ता महासंघ नवलपरासीको साधारण सभा तथा प्रथम अधिवेशन शनिवार बर्दघाटमा सम्पन्न भएको छ ।
महासंघका जिल्ला अध्यक्ष राजकुमार श्रेष्ठको अध्यक्षता र जिल्ला समन्वय समिति नवलपरासीका प्रमुख भगौती यादव (रुदल) को प्रमुख आतिथ्यमा साधारण सभा सम्पन्न भएको हो । समन्वय प्रमुख यादवले जिल्लामा थुप्रै खानेपानीका ओभरहेड ट्याङ्की निर्माण भएपनि समयमा सम्पन्न नहुँदा उपभोक्तालाई शुद्ध खानेपानीको पहुँच पु-याउन नसक्नु अहिलेको चुनौती भएको बताउनु भयो । उहाँले अधुरो खानेपानी आयोजनालाई गाउँपालिका वा नगरपालिकाले पहिलो प्राथमिकता राखि पुरा गर्नु पर्नेमा जोड दिनुभयो ।
कार्यक्रममा वर्दघाट नगरपालिकाका नगरप्रमुख शम्भुलाल श्रेष्ठले उपभोक्ताको शुद्धपिउने पानीको अधिकारलाई सुनिश्चित गर्न उपभोक्ता समितिहरु जिम्मेवार हुनु पर्ने बताउनु भयो । उहाँले खानेपानी उपभोक्ता समितिलाई २५ प्रतिशत कर लगाउने कुरा न्यायोचित नभएको भन्दै कर मिनाहाको लागि आफू प्रतिवद्ध रहेको बताउनु भयो ।
कार्यक्रममा खानेपानी तथा सरसफाई उपभोक्ता महासंघ लुम्बिनी प्रदेशका अध्यक्ष थानप्रसाद गैरेले खानेपानी तथा सरसफाई क्षेत्र पालिकाहरुमा उपेक्षामा परेको बताउनु भयो । उहाँले उपभोक्ता समितिलाई परेका समस्या समाधानमा पालिकाले साथ दिन आग्रह गर्दै उपभोक्ताहरु एकजुट भएर लाग्न आव्हान गर्नु भयो ।
महासंघको साधारण सभामा खानेपानी उपभोक्ताको क्षेत्रमा महत्वपूर्ण योगदान गर्ने वर्दघाट खानेपानी उपभोक्ता संस्था र सरससफाईको क्षेत्रमा संचार संस्थाको तर्फबाट योगदान गर्ने परासी सूचना तथा संचार सहकारी संस्था लि.द्धारा संचालित सामुदायिक रेडियो परासी ९०.२ मेगाहर्जलाई सम्मान गरिएको छ ।
कार्यक्रममा सामुदायिक वन उपभोक्ता महासंघका जिल्ला अध्यक्ष सारदा पोख्रेल, वर्दघाट खानेपानी तथा सरसफाई उपभोक्ता संस्थाका अध्यक्ष दिपक लम्साल, सामुदायिक रेडियो परासीका प्रवन्ध निर्देशक मेघराज गौतम, खानेपानी महासंघकी जिल्ला उपाध्यक्ष तारा सुनार लगायतले शुभकामना व्यक्त गर्नु भएको महासंघका सचिव देविदत्त सापकोटाले जानकारी दिनु भयो ।
यसैबीच आजै सम्पन्न प्रथम अधिवेशनबाट खानेपानी तथा सरसफाई उपभोक्ता महासंघ नवलपरासीको अध्यक्षमा देविदत्त सापकोटा अध्यक्षमा सर्वसम्मत निर्वाचित हुनु भएको छ । यस्तै महासंघको उपाध्यक्षमा जुनाकुमारी कण्डेल, सचिवमा मुक्तिवहादुर भण्डारी, सहसचिवमा लोकेन्द्रवहादुर पाण्डे, कोषाध्यक्षमा शोभाकान्त कोइराला सर्वसम्मत निर्वाचित हुनु भएको छ । यस्तै महासंघको सदस्यहरुमा क्रमशः तोलाकान्त चापागाईं, भेषनारायण चौधरी, गोविन्दप्रसाद गैरे, दुर्गानारायण थारु, खडानन्द कोइराला, गिता वि.क., सरस्वती खड्का केसी, गोमा आचार्य, चित्रकला तिवारी र श्रीकला ज्ञवाली निर्वाचित हुनु भएको हो ।
यस्तै खानेपानी तथा सरसफाई महासंघ नवलपरासीको तीन सदस्यीय लेखा समितिको संयोजकमा नरिश्वर पराजुली सर्वसम्मत चयन हुनु भएको निर्वाचन समितिका संयोजक कुलदेव श्रेष्ठले जानकारी दिनु भयो ।
